Windows 10 веќе доаѓа со апликацијата My Office. Оваа апликација овозможува прегледување на Office сметката, доколку плаќате за истата, последните документи кои ги имате користено и слично.
Оваа апликација ќе биде заменета со нова која едноставно ќе биде наречена Office. Исто како и My Office, така и новата Office ќе биде достапна преку Microsoft Store, а доколку ја немате избришано првата, истата ќе биде надградена на новата.
Новата апликација наликува доста на office.com порталот, односно почетната страна. Таа е и направена врз основа на оваа страна, за која од Microsoft истакнуваат дека е навистина популарна од кога беше редизајнирана. Според нив, 40% од корисниците на Office 365 на веб, ја почнуваат својата работа со отворање на оваа страна, наместо директно потребната апликација.
Ова и има логика да биде случајот со Office апликацијата. На неа корисниците ќе може да ги видат сите свои Office апликации и да ги вклучат, но ќе им бидат прикажани и документите на кои работат, документите кои се споделени со нив и слично, а ќе може и да пребаруваат.
Дефинитивно ова централно место е одлично стартно место за тие кои работат со повеќе документи од повеќе Office апликации, а имаат и соработка со повеќе корисници.
Деловните корисници ќе можат да го додадат и своето лого на оваа апликација, па истата да претставува вистински портал за Office на своите вработени.
Моментално Office им е достапна само на Insider корисниците, а од компанијата не најавија кога ќе им стане достапна на сите, па само кажаа наскоро.
