Од денеска е достапна 29-тата верзија од интернет прелистувачот од Mozilla, Firefox. Оваа верзија е можеби помеѓу најважните од започнувањето на побрзиот циклус на надградби. Од оваа верзија официјално е достапен за сите корисници новиот дизајн наречен Australis, кој што претставува најголем редизајн на прелистувачот, можеби од неговото претставување. Доста од вас се можеби веќе запознаени и го користат новиот дизајн преку до денес достапната бета верзија која што детално ја опишавме кога беше претставена.
Како што можевте да прочитате и во претходната статија, Firefox 29 доаѓа со нов дизајн, за кој што многу луѓе сакаат да кажат дека е сличен со дизајнот на Google Chrome. Меѓутоа иако одредени работи имаат сличност, сепак ние не би се сложиле со овие изјави поради фактот што Chrome не користи некои уникатни и само за нив карактеристични дизајн елементи, па одредени сличности се секогаш можни и не значат нивно копирање. Australis дизајнот кој што ќе се користи од оваа верзија на Firefox, па натаму ги вклучува следните промени:
- Поедноставување на корисничкиот интерфејс кој што треба да е полесен за користење
- Ново мени копче кое што е променето од старото и познато портокалово и правоаголно, во помало копче со често користената икона од три линии. Позицијата на копчето е поместена од горниот лев агол, на десниот дел во лентата десно од лентата за пребарување
- Поедноставно мени кое што овозможува негово прилагодување, со што секогаш ќе ги имате вашите најважни и најмногу користени работи, а останатите можете да ги тргнете од него
- Нов дизајн на табовите кои што сега се со заоблени агли, наместо правоаголните до претходната верзија. Активниот таб, односно тој што моментално го користите е истакнат и е со различна боја
- Можност за исклучување на лентата за наслови, односно title bar со што поголем дел од екранот е искористен за веб страните, а табовите одат до неговиот крај
- Вашите омилени и зачувани страни сега се поставени заедно со ѕвездата за зачувување на страни, како дел од лентата десно од лентата за пребарување
Australis редизајнот е можеби најголемата промена во оваа верзија од прелистувачот, меѓутоа тоа не е единствената нова работа. Па така, од оваа верзија почнува со функционирање новата и преработена верзија од Firefox Sync која што го поедноставува процесот на синхронизација и овозможува едноставно поврзување со сервисот преку креирање на корисничка сметка.
Firefox 29 е достапен за сите платформи, односно Windows, Linux, OS X и можете да го надградите доколку тоа веќе автоматски не е направено или да го симнете преку следниот линк. Целосната листа на промени со оваа верзија можете да ја погледнете на следниот линк.
Firefox 29 е достапен и за Android оперативниот систем
Како и секогаш, со новата верзија за десктоп компјутерите, Firefox ја надградува и својата мобилна верзија, односно верзија за Android корисниците. Во оваа верзија, покрај стандардните подобрувања во перформансите ги има и следните новини:
- Можност за креирање на Firefox сметка за користење на новата Sync функција
- Препораки при пребарување користејќи го Bing пребарувачот како главен
- Додадени се повеќе копчиња за брзо споделување на содржината
- Можност за избор дали горната лена ќе се прикажува при читање на страната, односно одење надоле по неа
Firefox 29 е достапен во продавницата за апликации и можете да го надградите или симнете преку следниот линк. Целосната листа на промени можете да ја погледнете преку следниот линк.