Користењето на 64-битна архитектура е стандард веќе подолго време. Тоа значи дека компјутерите коишто корисниците ги купуваат доаѓаат со 64-битни процесори, па соодветно на тоа и оперативниот систем којшто го користат е во неговата 64-битна верзија.
Поради тоа, корисниците добиваат можност да инсталираат 64-битни верзии од програмите кои ги користат, а со тоа да добијат одредени предности. Главните предности кои се добиваат се можноста за користење на повеќе РАМ меморија, односно над 3,5/4GB, подобра стабилност и сигурност.
Доколку одредена програма која ја користите има 64-битна верзија, препорачливо е да ја инсталирате таа, наместо 32-битната која веќе и нема зошто да се користи, односно нема некои посебни предности и причини.
Google ќе започне со автоматско надградување на Chrome прелистувачот на 64-битната верзија кај корисниците кои се’ уште ја користат 32-битната, а нивниот компјутер ја поддржува 64-битната верзија.
Тоа значи дека доколку имате компјутер со инсталиран 64-битен оперативен систем, повеќе од 4GB РАМ меморија, Chrome од последната надградба, односно од верзијата 58.0.3029.96, па навака, автоматски ќе се надгради на 64-битната верзија од прелистувачот.
Повеќето корисници и нема да го забележат ова, а посебно затоа што најверојатно тие ја користат 32-битната верзија поради не информираност или едноставно не сакање да „губат“ време во барање на другата верзија.
Сепак, 32-битната верзија од прелистувачот ќе остане достапна за симнување на официјалната страна, па сите корисниците кои не ги задоволуваат условите за 64-битната верзија, не треба да се грижат, нивниот прелистувач ќе остане достапен и функционален.
