Beddit е финска компанија која работи на развој на еден производ. Тој производ е сензор и апликација за следење на спиењето, нешто што стана доста популарно изминатите години со развојот на технологијата.
Beddit како производ, во споредба со своите конкуренти, нуди предност поради фактот што сензорот е во форма на лента која се поставува под чаршавите на креветот. Со тоа корисниците нема потреба да спијат со нивниот мобилен телефон или паметен часовник, што сигурно не е баш удобно.
Оваа компанија од оваа недела станува дел од Apple. Информацијата излегува во јавноста преку промената на политиката за приватност на страната на Beddit на којашто е истакнато купувањето.
Повеќе информации моментално од компаниите нема, па останува да се дознае сумата која Apple ја платиле, како и тоа што планираат да прават со компанијата.
Ваквите купувања често се прават како за самиот производ и неговиот развој, така и за купување на тимот којшто го развива и кој би требало да продолжи да работи на развој на таква и слична технологија за новата компанија.
Со оглед на тоа што на повеќето од нас оваа компанија не ни е позната, не ни прави некоја посебна разлика што точно ќе се случи, но фактот што се работи за Apple дефинитивно го привлекува вниманието.
