Скоро секој од нас барем еднаш во животот требал да направи некаков тип на презентација и големи се шансите тоа да го имате правено во PowerPoint. Денес, овој програм кој е дел од Office 2016 е многу подобар од тој што го знаеме од порано, со многу повеќе функционалности (кои водат до многу поубави презентации), а отсега Microsoft додава и преведувач во живо.

Поточно, PowerPoint ќе има Presentation Translation plugin (плагин за преведување на презентации), кој го користи Microsoft Translation API со цел да може да преведе секаков вид на текст во истиот момент. Нешто како што Google Translate го користиме за преведување на цели веб страни.

Но, преведувачот во PowerPoint ќе има и дополнителни можности, како на пример правење „преводи“ на истиот или други јазици на аудио датотеки или пак видеа во презентацијата, нешто налик на можностите кои ги има YouTube.

Преведувачот е резултат на работата на Microsoft Garage проектот, кој во минативе години извади многу интересни апликации, сервиси и решенија. Плагинот инаку ќе биде достапен за Office 365 корисниците.

Преведувачот во PowerPoint засега сепак поддржува само 10 јазици, меѓу кои го нема македонскиот: Арапски, Кинески, Англиски, Француски, Германски, Италијански, Јапонски, Португалски, Руски и Шпански. Секако, во иднина Microsoft планира да интегрира многу повеќе јазици во оваа функционалност во PowerPoint.

Извор: The Next Web, TechCrunch, Engadget

Фото: Engadget, Tech Crunch

Претходна статијаApple ја купи финската компанија Beddit
Следна статијаНа Windows 10 S ќе може да сурфате само преку Microsoft Edge