Катанците иако стари производи, се’ уште се едни од најмногу користените производи за заклучување на одредени простории или предмети. Се користат за заклучување на велосипедите, за заклучување на подрумските простории, складишта и слично. Меѓутоа овој производ се’ уште ги користи клучевите или бравите со комбинација на бројки за нивно заклучување, односно отклучување.
Noke е катанец кој што ја искористува достапноста на технологија во 21-от век и го модернизира овој едноставен, а корисен производ. Наместо користење на клучеви, кои што многу лесно можат да бидат изгубени, кои доколку ги дадете на некого треба да запомнете да ги земете или користењето на шифри кои што лесно можете да ги заборавите, Noke работи едноставно преку Bluetooth. Овој катанец не вклучува никакви брави, односно клучеви или шифри. Единствен начин да биде отклучен е преку поврзување со апликацијата на вашиот мобилен телефон со која што се поврзува преку Bluetooth LE. Апликацијата е достапна за двете најпопуларни платформи, односно за Android и iOS. Катанецот исто така е отпорен на вода, па е погоден за користење на било какви локации.
Катанецот работи на тој начин што го поврзувате со вашиот мобилен телефон, по што секогаш кога сакате да го отклучите се што треба да направите е да го притиснете горниот дел од катанецот и тој ќе се отклучи, се разбира доколку се доволно блиску за остварување на Bluetooth конекција, односно не подалеку од 3 метри. Доколку го заборавите вашиот мобилен телефон или се погоди да неговата батерија е потрошена, Noke можете да го отклучите преку притискање на одредена секвенца на горниот дел.
Noke исто така поддржува споделување на пристапот до други корисници. Тие се што треба е да ја инсталираат апликацијата, по што вие ќе им доделите пристап. Тогаш и вашите пријатели ќе можат да го отклучат катанецот на ист начин како вас. Пристапот можете да го доделите еднократно или во одредени претходно прилагодени денови.
Овој катанец е погоден за користење на сите места каде што и досега имате користено катанци. Доколку сакате да го користите за вашиот велосипед, можете да го нарачате и додатниот кабел и држач, а можете да го користите и со ваш постоечки.
Noke моментално е понуден на Kickstarter платформата каде што има собрано нешто повеќе од 35.000 долари од потребните 100.000 на 30 дена до истекот на рокот. Може да се нарача по цена од 59 долари, а кабелот за велосипед чини дополнителни 20 долари.
Извор: Kickstarter