Преку нивниот блог, Google соопштија дека имаат издадено повеќе од 50 API алатки со поддршка за .NET. Овие алатки, кои што и претходно им беа достапни за користење на програмерите, сега ќе овозможат многу полесно поврзување со сервисите на Google. Потенцијално од ова може да се очекуваат нови апликации кои што ќе го пополнат недостатокот на Google апликации во Windows 8 и Windows Phone 8 платформите, како Google+, YouTube, Calendar, Drive и слични. Целосната листа на достапните алатки програмерите може да ја погледнат на следниот линк, како и туторијал за започнување на нивно користење на следниот.
Ова сепак не значи официјална поддршка од страна на Google за платформите на Microsoft, а посебно Windows Phone, а исто така не значи дека познатите апликации ќе бидат официјално достапни. Многу корисници се надеваат дека ова ќе значи и повторно враќање на YouTube апликацијата направена од страна на Microsoft која што беше популарна, но таа сепак беше тргната поради нарушување на Условите за користење на Google и оваа новост нема истата да ја врати назад.
Извор: Google Blog
