Од денеска достапна е најновата верзија од Mozilla Firefox веб прелистувачот. Новата верзија го носи бројот 26 и е достапна за сите поддржани платформи, односно за Windows, Linux, OS X и Android. Можете да ја инсталирате преку самиот прелистувач или преку следниот линк за десктоп верзијата и преку Play Store на Android.
Ново за десктоп околината е воведувањето на Click-to-Play функцијата за Java, односно веб страните кои што бараат Java веќе нема автоматски да работат, туку вие ќе треба да кликнете за да биде вклучен Java додатокот (plugin). Доколку често посетувате одреден сајт кој што користи Java, ќе може да изберете секогаш Java plugin-от да се активира автоматски за тој сајт. Официјалната листа на новости за оваа верзија на Firefox за десктоп вклучува:
- Менаџерот на лозинки сега поддржува полиња генерирани од скрипта
- Ажурирање на Firefox ќе може да се прави од страна на корисници без привилегии за пишување на Firefox папката (потребно е да биде инсталирана Firefox Maintenance функцијата)
- Поддршка за пуштање на H.264 видеа на Linux доколку потребните gstreamer додатоци се инсталирани
Целосната листа на нови и променети работи во Firefox 26 можете да погледнете на следниот линк.
Најинтересната промена во 26-та верзија од Firefox доаѓа за Android. Истата донесува нов редизајниран Home екран кој што се појавува кога ќе го вклучите прелистувачот, кога ќе отворите нов таб или кога ќе притиснете на лентата за адреси. Како и до сега прикажани се вашите најпосетувани сајтови со нешто променет изглед. Со повлекување од десно кон лево добивате пристап до уште 3 ленти на кои се вашите зачувани сајтови (bookmarks), сајтовите зачувани за читање подоцна и историја на посетените сајтови. Други новости во оваа верзија за Android се:
- Менаџерот на лозинки сега поддржува полиња генерирани од скрипта
- Поддршка за Intel x86 процесори, кои може да се најдат во уредите: Motorola RAZR i, ASUS Fonepad ME371, Acer Liquid C1, Lenovo K900 IdeaPHone и Samsung GALAXY Tab 3 (10.1).
Целосната листа на нови и променети работи во Firefox 26 за Android можете да погледнете на следниот линк.
