Во најновите верзии од бета и дев каналите од Windows Insider програмата, Microsoft додаде три нови функции кај новата Photos апликација. Оваа апликација беше редизајнирана минатата година, а меѓу другите работи, беше додадена и интеграција со iCloud.
За новите функции Microsoft истакнува дека се доста барани од корисниците, па во месеците што следат сите ќе ги добијат овие подобрувања.
Првата новина е можност за разгледување на сликите во форма на слајдови, односно „slideshow“. Ова е доста корисно кога се прикажуваат повеќе слики, на пример од одмор или некој настан, па нивното пуштање на целиот екран со различни транзиции, анимации и музика, го прави искуството доста подобро.
Корисниците ќе имаат 25 песни кои ќе можат да ги изберат при правењето на слајд презентацијата.
Втората новина исто така е доста корисна, а посебно кога се бараат некои слики од поодамна. На десната лента се додава можност да се пребарува листата според месеците и годините, па на тој начин лесно може да се побара што сме правеле за 1 мај 2017, на пример.
Третата новина овозможува да се тргнат одредени делови од сликите кои не се потребни, дали поради „естетски“ причини, дали поради несакани флеки и слично.
Овие новини се достапни за сите слики во апликацијата, односно не е важно дали тие се од компјутерот, од OneDrive или од iCloud.
