Компанијата Atlas VPN, врз основа на податоци од GlobalStats, излезе со статистика за бројот на корисници на интернет прелистувачите. Очекувано, а така изгледа ќе биде уште доста време, првото место го држи Google Chrome со повеќе од 3,3 милијарди корисници.
Тоа што е ново е поминувањето на границата од 1 милијарди корисници од страна на Safari од Apple, а ова е првиот прелистувач после Chrome кој успева да го постигне ова.
Бројките се однесуваат на целиот свет, а исто така за сите платформи заедно, односно на мобилните, таблет и десктоп компјутерите.
После Chrome и Safari, кои држат 64,91% и 19,03% од пазарот, доаѓаат Microsoft Edge со скоро 213 милиони корисници и 3,99% од пазарот, па Mozilla Firefox со скоро 180 милиони корисници и 3,26% од пазарот.
Веќе одреден период Firefox ги губи своите корисници, а тоа посебно дојде до израз по претставувањето на новата верзија од Microsoft Edge, направена на основа на Chromium кодот, со што овој прелистувач стана побрз и целосно компатибилен со сите веб страни.
Петтото место според оваа листа го има Samsung Internet кој е достапен само на мобилните и таблет компјутерите на Android, но сепак е доста популарен и има скоро 150 милиони корисници, а тоа е доволно за 2,86% од пазарот.