Колку пати ви се појавила ситуација во која треба да ископирате дел од приказот на екранот за да му укажете на некој што треба да види или направи, место да објаснувате со брда текст? Ако не сте користеле некоја алатка досега веројатно сте правеле Print Screen па paste во Paint, па сечење на делот кој ви е потребен, па Save As…
Greenshot е програм кој ви овозможува да избегнете барем неколку чекори од овој процес. Програмот е бесплатен, со отворен код, и за Windows, но е добро изработен и полн со опции во врска со оваа задача. Тој обично се врзува за копчето Print Screen на тастатурата (што можете да го промените). При притискање на ова копче вашиот глушец се претвора во „мета“ со која можете да одберете кој точно простор сакате да го преземете од екранот.
По одбирањето се појавува мени кое ви нуди неколку опции за зачувување и уредување на сликата. Можете да ја зачувате на посебна локација (Save As…), на стандардно место, да ја уредите со уредувачот на слики од самиот програм или со Paint, да ја закачите директно на Imgur… опциите се бројни и јасни, што овозможува брзо и лесно користење на овој програм.
Ако кликнете со десното копче на неговата икона во лентата на програми ќе можете да одберете и други опции за преземање содржина, како што се преземање на некој посебен прозорец, на целата површина, на последниот регион итн. Дополнително, ваму можете да ги нагодите претпочитувањата за тоа како да работи програмот.
Програмот работи одлично и брзо, не го кочи компјутерот и не зема премногу меморија, а во комбинација со неговата цена и принципот на отворен код сметаме дека е одличен додаток за вашето секојдневно работење.
