Firefox прелистувачот со својата најнова верзија, односно верзијата 127, донесува новина која треба да ја подобри приватноста на корисниците кога се во прашање нивните зачувани лозинки на овој прелистувач.
Поточно, корисниците на Windows и macOS за да пристапат до своите лозинки во Firefox или да ги искористат на некоја страна, ќе мора да ја внесат лозинката од нивниот оперативен систем, односно да го искористат системот за заштита.
Доколку ги имаат вклучено функциите за отисоци од прсти, скенирање на лицето или само пин код, истото ќе може да се искористи за пристапот до лозинките на Firefox.
Со други зборови, овој систем корисниците веќе го користат кога треба да ја искористат нивната платежна картичка, на пример, како додатен начин на заштита со повторно најавување.
Од Mozilla добро потсетуваат дека за најдобра заштита на лозинките во Firefox, се препорачува корисниците да користат и главна лозинка која посебно ги шифрира зачуваните лозинки и е потребна за да воопшто може да бидат дешифрирани.
Оваа лозинка не се чува на дискот од компјутерот, па е многу потешко да се добие пристап до зачуваните лозинки без дозвола од корисникот.
