Првиот паметен часовник од Google конечно ќе стигне на 6. октомври, за време на официјалното претставување на Pixel 7 серијата. Од компанијата веќе го прикажаа часовникот, па знаеме и што да очекуваме, но како и секогаш, се остава доволно и за настанот кој претстои.
Google пушти уште едно видео на кое нешто повеќе се прикажува Pixel Watch, неговиот дизајн, достапните ременчиња, како и дизајнот на различните „лица“ кои ќе можат да се поставуваат.
Во видеото се потсетува и на интеграцијата која ќе ја има со Fitbit, нешто што е посебна карактеристика на Pixel Watch и се чека на истата уште од купувањето на компанијата од страна на Google.
Тоа што сепак малку разочарува на инаку одличниот и класичен, минималистички дизајн, се големите рамки околу екранот со што со право некои го нарекуваат одличен часовник за пред неколку години.
Видеото е во продолжение, па самите заклучете дали би го избрале овој часовник наспроти Apple Watch, Galaxy Watch, Huawei Watch и сличните.