Кога викам подобар од очекувањата мислам на тоа што јас го очекував од овој телефон. Сепак не ги сакам многу овие поголеми телефони, па мислев дека едноставно ќе биде преголем за нормално користење, а тотално непогоден за носење во џеб.
Меѓутоа по негово користење и чепкање неколку дена, веќе сменив мислење. Првото нешто што најмногу ми остави впечаток е неговиот дизајн кој што е променет од досегашните модели, како и тоа колку е лесен. Иако се работи за телефон со голем екран, тој воопшто не е телефон кој што делува гломазен и огромен. Користењето на целосно алуминиумско тело со заоблени страни е одличен избор и за разлика од претходните модели, овој е многу поудобен за држење.
Екранот, нешто што секогаш е добра страна на Apple производите, е одличен и се на него изгледа чисто, со добро изразени бои. За оперативниот систем не би пишувал многу, сепак истиот е достапен и на другите модели. За Plus моделот единствено е карактеристично што тој поддржува вртење во landscape mode на главниот екран, по што работите се прилагодуваат за таа поставеност.
Работата со iPhone 6 Plus како што би очекувале е мазна, но ова е карактеристично за оперативниот систем кој што е навистина оптимизиран за работа на мал број на уреди. Останатото останува само на преференциите на самиот корисник дали сака да ја користи оваа или некој од другите конкурентни платформи.
Од не толку големото искуство на користење на Apple производи, повторно забележав колку побрзо и помазно функционираат работите за разлика од Android оперативниот систем. Споредба направивме на обично прегледување на мапи преку Google Maps, нешто што не може да помине без мало каснење дури и на Note 4 телефонот, а се разбира на iPhone работи безпрекорно.
Во продолжение можете да видите кратко претставување на iPhone 6 Plus, па да добиете претстава како тој изгледа, па полесно да се одлучите во случај да размислувате за вашиот следен телефон.
