Германската компанија Carbon Mobile го претстави првиот телефон кој е целосно направен од јаглеродни влакна, односно со куќиште во кое е вградена целосната структура на внатрешните компоненти.
Carbon 1 MK II е телефонот кој го претставија од Carbon Mobile, кој е еден од полесните и потенки телефони на пазарот. Тоа е возможно поради користењето на јаглеродни влакна, кои се многу издржливи, а доста лесни, со што се добива навистина одличен уред за кој нема да мора многу да се мисли дали може да се оштети.
На ова треба да се додаде и најновата верзија од Gorilla Glass, Victus, кој исто така е имплементиран во една од потенките изведби од само 0,4 милиметри.
Предизвикот кој го има надминато Carbon Mobile е можноста да поминуваат непречено мобилните сигнали, нешто што од компанијата го развиваат изминатите 4 години. Технологијата е наречена HyRECM – Hybrid Radio Enabled Composite Material.
Остатокот од телефонот може да се каже дека не е баш соодветен кога ќе се земе во предвид цената од 800 евра. Сепак, оваа цена во главно се плаќа за изработката од јаглеродни влакна, нешто што во ваква форма е прво на пазарот.
Carbon 1 MK II доаѓа со 6 инчен AMOLED екран со резолуција од 2.160 на 1.080 пиксели. Работи на Helio P90 чипсетот кој е изработен во 12nm технологија, а има и 8GB RAM и 256GB простор за податоците. На задната страна се поставени две исти камери со по 16 мегапиксели, додека предната камера има 20 мегапиксели. Батеријата е со капацитет од 3.000 mAh.
Телефонот работи на Android 10, не на најновата верзија сепак, а истата се најавува дека ќе биде пуштена оваа година.
Во продолжение можете да го погледнете настанот на кој беше претставен овој уред.