Пред една недела корисниците на Apple за првпат добија вградени функции со генеративна вештачка интелигенција, односно најголемиот дел од корисниците, кои не ја користат бета програмата. На 28 октомври Apple ги пушти iOS/iPadOS 18.1 и macOS 15.1 верзиите со кои дојде и Apple Intelligence.
Како што веќе со месеци е познато, Apple не ги пушти сите презентирани во јуни Apple Intelligence функции веднаш, па истите ќе бидат пуштани постепено до пролет.
Сепак, повеќето од најавените функции ќе бидат пуштени со iOS 18.2 верзијата, па ќе остане само целосно подобрената верзија од Siri за идната година.
Марк Гурман, преку неговиот најнов неделен билтен, го најавува пуштањето на iOS 18.2, како и macOS 15.2, за почетокот на идниот месец, поточно на 2 декември. Доколку ова се покаже како точно, корисниците нема многу да чекаат додека на нивните Apple уреди ги добијат повеќето од најавените Apple Intelligence функции.
Со наредната група на Apple Intelligence функции ќе станат достапни Image Playground апликацијата за генерирање на слики, Genmoji функцијата за генерирање на „емоџи“ икони, како и интеграцијата на ChatGPT во Siri.
Најголемите новини кај Siri, како што е пристапот до податоците на корисниците и разбирање на содржината на тоа што во моментот се прави, Гурман ги најавува со iOS 18.4, верзија која треба да биде пуштена во април.
Со оваа верзија корисниците од Европската Унија за првпат ќе добијат пристап до Apple Intelligence.
