Сигурно никој не мисли дека луѓето кои ќе ја сочинуваат првата колонија на Марс, ќе им биде лесно и дека целата мисија ќе помине без проблеми. Сепак, Елон Маск реши да ја објасни ситуацијата малку посериозно истакнувајќи дека има големи шанси да се умре на планетата, но и на патот кон неа.
Треба да се земе во предвид дека иако мисијата се планира за наредните декади, со што дополнително ќе напредне потребната технологија, сепак самиот пат до Марс е пат што ќе трае барем една година, по што следи слетувањето, па дури тогаш преживување на планетата. Самото полетување од Земјата уште се смета за доста ризична работа, па јасно е од каде доаѓа коментарот на Маск.
Изјавата Маск ја даде на почетокот од оваа недела на самитот „Humans to Mars“ каде говореше за се што е потребно за мисијата, како и тоа до каде се со развојот на Starship леталото.
„Стигнувањето до Марс, мислам, не е основниот проблем. Основниот проблем е изградбата на база, изградбата на град на Марс кој ќе биде само-одржлив. Сакам да нагласам, ова е многу тешко и опасно нешто. Не е за тие со слабо срце. Големи се шансите дека ќе умрете. Ќе биде тешко, но ќе биде навистина славно ако испадне.“ – истакна Маск.
Јасно е дека предупредувањето кое го дава Маск се однесува на сите можности за случување на некаков проблем, незгода, на една ваква опасна мисија, но исто така може да се сфати и како тоа дека ако се биде како што треба, луѓето ќе останат да живеат на планетата, без да се вратат назад.
