TCP, односно Transmission Control Protocol е главниот протокол кој се користи и денеска, иако постои уште од 1974 година. Овој протокол, во основа е задолжен за тоа како датотеките кои се испраќаат од компјутер до компјутер на интернет се поделени и потоа повторно составени за да може да бидат прикажани на целната дестинација. Кратко кажано, ова е протоколот кој го одредува начинот на пренесување на податоците од кои зависи отворањето на веб страните, гледањето на видео содржина, симнувањето на датотеки и слично.
Google започна со креирање на понова алтернатива на овој протокол, направена на основа на UDP – User Datagram Protocol, но со додатни функции кои ги немаше кај овој веќе развиен протокол. Google својот протокол го нарекува QUIC – Quick UDP Internet Connections и го развива изминатите осум години, односно од 2013.
За почеток Google го користи QUIC протоколот за своите сервиси, а беше достапен и како посебен додаток на Chrome прелистувачот. Заинтересираните компании можеа да го тестираат и користат овој протокол кој овозможува поголема брзина, која според информациите од Google е доволно поголема да направи значајна разлика.
Сега QUIC протоколот е издаден како официјален протокол од страна на IETF организацијата, што значи дека тој може и официјално да се користи од страна на сите заинтересирани.
Според Google, прикажувањето на резултати од пребарувања е побрзо за 8% на компјутерите, односно 4% кај мобилните. Поголема разлика има кај чекањето да почне да се прикажува YouTube видео, со 18% подобрување кај компјутерите и 15% кај мобилните.
Уште поважно, овој протокол го забрзување и отворањето на шифрираните страни, нешто што би направило голема разлика при отворањето на страни како што се банкарските и слични деловни сервиси.
Се претпоставува дека ќе помине доста време додека повеќето компании го прифатат овој протокол и истиот го имплементираат, односно се очекува дека ќе поминат повеќе години.
