Инженери од University of Florida и University of New Hampshire за време на Black Hat USA 2022 презентираа концепт технологија која може да се користи за напад и контрола на уредите со екрани на допир. Сепак, оваа технологија може да најде примена и во лабораториите каде контролата на одредени уреди не може да се прави директно од човекот.
Концепт технологијата е наречена „невидлив прст“, а името доаѓа од фактот дека инженерите успеале да го постигнат токму тоа, контрола на екраните на допир од далечина без директно допирање.
Ова се постигнува преку генерирање на електромагнетно поле со точна фреквенција преку кое се испраќа волтажа до екранот за да може да ја прочита како класичен допир.
Модерните екрани на допир во основа и така функционираат, односно како допир се детектира промена во волтажата, со што се смета дека корисникот допрел на тој дел од екранот.
За работа на технологијата се користат неколку антени и роботска рака, а истата може да контролира уреди на оддалеченост од неколку сантиметри, но не и подалеку.
Во оваа фаза оваа технологија е доста ограничена, но како што истакнуваат инженерите кои ја имаат развиено, сега кога е познато што може да се направи, други може да ја унапредат.
Како тест за можноста на „невидливиот прст“ користени се уреди како iPad, OnePlus, Google Pixel, Microsoft Surface и слични. Успешно се симулирани активности како допир, долг допир, повлекување и слично.
Како еден начин за заштита од можни идни напади кои би користеле ваква или слична технологија, се истакнува една функција која порано беше достапна на iPhone, а тоа е детектирање на притисок за да функционира екранот, а не само промена на волтажата.
