Останува уште точно една недела до настанот на Apple на кој ќе ја претстави новата iPhone 14 серија. На овој настан, покрај iPhone 14, се очекува да бидат претставени и Watch Series 8 часовниците, нови AirPods Pro, iPad, Mac Pro, па ќе видиме дали уште нешто додатно.
Со месеци веќе можевме да видиме неофицијални информации за што ново ќе донесе iPhone 14, а сега го имаме и првото неофицијално видео кое ги потврдува претходните информации.
Како и секогаш, колку и да се покажуваат како точни неофицијалните објави, сепак не треба да се сметаат 100% точни.
Од краткото видео, како и неколку објавени слики, може да се види изгледот на iPhone 14 Pro, заедно со замената на исечокот на екранот со дупка за камерата и дупка во форма на „апче“ за Face ID системот.
Дополнително, ова видеото се гледа нова боја која треба да биде достапна како избор, а тоа е виолетовата боја, која барем на видеото личи дека ќе ги менува нијансите зависно од аголот на гледање и светлината.
Тоа што дополнително се очекува од iPhone 14 Pro моделите е нова главна камера со 48 мегапиксели, а уште поважно, додавање на Always On функцијата на екранот, нешто што одамна се очекува и е доста популарно на Android.
Дел од информациите се сметаат за веќе сигурни, па тоа што нас не интересира од настанот идната недела е достапноста на Always On екранот, нешто што најмногу би направило да вреди надградбата на понов модел.
Основните модели, односно iPhone 14 и iPhone 14 Max, се очекува дека оваа година ќе бидат поразлични од Pro моделите, па наводно ќе продолжат да имаат исечок на екранот, ќе го користат ланскиот чип и нема да ги имаат новите камери, иако се очекува некакво подобрување на селфи камерата.
