Иако до некаде разочара со карактеристиките, а посебно кога излезе неговата конкуренција Galaxy Z Flip, сепак RAZR од Motorola доволно го привлече вниманието на корисниците, а посебно на фановите на оригиналната и стара верзија од овој телефон.
Веќе одреден период се најавува дека Motorola ја спрема втората верзија од RAZR, па сега имаме и официјална дата кога можеме да ја очекуваме истата, иако од компанијата не го потврдуваат тоа, барем не 100%.
Од Motorola почнаа да испраќаат покани до медиумите со најавата дека „тие повторно ќе го „преклопат“ корисничкото искуство на смартфоните“. Од ова е јасно дека уредот што ќе биде претставен ќе биде со екран на преклопување, а најверојатно повторно ќе биде како што беше RAZR, односно нова и подобрена верзија од уредот.
Ако се земат неофицијалните информации, може да се очекува подобар чипсет, односно наместо Snapdragon 710 како во првиот модел, Motorola ќе го вклучи Snapdragon 765. Ова е процесор од нешто повисока класа, па може да се очекуваат доста подобри перформанси, а тука е и 5G поддршката.
Исто така, се очекува зголемување на меморијата на 8GB RAM и 256GB на просторот за податоци. Батеријата исто така ќе биде поголема, 2.845 mAh, но повторно со капацитет кој остава прашања за издржливоста на уредот.
Тоа што исто така се очекува е средување на некои од можните проблеми кои се јавуваат кај сите вакви телефони поради тоа што технологијата за екрани кои се виткаат уште е во почетокот.
