Студија од NASA, поточно од нивниот Sea Level Change Team, во соработка со University of Hawaii, објавена во Nature Climate Change, открива дека од 2030тите градовите кои веќе имаат проблем со поплави, ќе ги имаат многу повеќе.
Повеќе проблеми според студијата значи дека овие градови ќе имаат посилни поплави, но исто така тие ќе се случуваат почесто, па дури ќе има ситуации каде овие поплави траат и по цел месец со мали периоди на пауза.
Како причина за ова предвидување во студијата се истакнува влијанието на Месечината, нешто што одамна е познато, но овој пат засилено со зголемените нивоа на океаните и морињата поради климатски промени.
Месечината поминува низ две фази во својата орбита околу Земјата кои траат вкупно 18,6 години. Во половина од фазата влијанието на Месечината врз океаните, односно предизвикувањето на плима и осека е помало. Тоа значи дека влијанието врз плимата во овој период од орбитата е помало, како и врз осеката.
Во втората половина од фазата влијанието на Месечината е многу поголемо, нешто што и често е причина за поплавите кај крајбрежните градови и луѓето се веќе научени да живеат со оваа ситуација, а градовите се градени соодветно.
Месечината моментално е во „посилната“ фаза, но според NASA влијанието кое се предвидува уште не се случува поради тоа што зголемените нивоа на океаните и морињата нема достигнато доволно големо ниво.
Се верува дека доколку продолжи темпото на зголемување на водите, поради поголемите температури и топењето на мразот на Земјата, нивото ќе биде доволно зголемено да кога Месечината повторно ќе влијае повеќе на океаните, последиците ќе бидат многу поголеми.
Од NASA истакнуваат дека целта на оваа студија е да на време се направат потребните планови во градовите при градење на нови објекти, но и планирање на начини за заштита или намалување на последиците.
Иако студијата е направена во САД, доколку предвидувањата се покажат како точни, слично ќе бидат погодени сите крајбрежни градови во светот кои веќе имаат проблеми со поплави.
