Samsung почна со испраќање на покани за нивниот нареден Unpacked настан кој стандардно се одржува во овој период од годината.
Galaxy Unpacked: Get ready to unfold е официјалното име на настанот и ќе се одржи на 11ти август, датата се погодува во среда, а и овој пат ќе биде само онлајн настан. Почетокот ќе биде во 16:00 часот, а ќе може да се следи во живо преку страната на Samsung.
Од досегашните информации, а и името на настанот, јасно е дека може да се очекува претставување на новите генерации од уредите од компанијата со екрани кои се превиткуваат. Моментално Samsung има два такви модели, односно Galaxy Z Fold и Galaxy Z Flip кои се очекува да ја добијат својата трета генерација.
Galaxy Z Fold3 се очекува дека ќе биде наменет за корисниците кои обично сакаат нешто повеќе од својот смартфон и досега беа навикнати да го купуваат Galaxy Note уредот. Причината за тоа се најавите дека Samsung оваа година може да не претстави нов Note уред, а покрај шпекулациите за истото, со такви информација излегоа и од самата компанија.
Покрај новите уреди кои се превиткуваат, се очекува дека на овој настан може да биде претставен и нов паметен часовник. Интересно кај новата генерација од паметни часовници од Samsung е што веќе нема да работат на Tizen оперативниот систем од компанијата, туку на новата платформа развиена во соработка со Google, базирана на Android, односно Wear OS.
