Лондонското претпријатие задолжено за транспортот во градот, Transport for London (TfL), заедно со дизајнерската компанија за транспортни возила PriestmanGoode, го претставија новиот концепт на возови за познатото метро London Underground. Возовите, заедно со промена на платформите на станиците, се планира да бидат пуштени за првпат во употребна од 2020 година. Се работи за модернизирање на целиот систем кој што треба да одговори на се поголемиот број на жители во Лондон, а со тоа и патници, како и модерното време на паметни технологии.
Возовите ќе бидат направени на таков начин што веќе вагоните нема да бидат издвоени, односно патниците ќе можат слободно да се движат низ целиот воз без потреба од поминување низ врати. Тие исто така ќе бидат направени од нови материјали кои што овозможуваат помала тежина, а подобра заштита. Возовите ќе можат да застанат поблиску до платформата, па патниците веќе нема да има потреба да се грижат при влегување и излегување од возовите. Вратите исто така ќе бидат зголемени преку воведување на дупли врати, со што ќе се овозможи поголем проток на луѓе. Внатрешноста на возовите ќе го задржи класичниот изглед, а посебно на седиштата.
Возовите ќе бидат опремени со Wi-Fi конекција, а досегашните обични реклами ќе бидат заменети со дигитални екрани на кои што ќе бидат прикажувани информации за патниците, покрај стандардните реклами. На почетокот возовите ќе бидат контролирани од возач, меѓутоа тие се направени со можност за целосно само управување. Возовите без возач ќе бидат постепено пуштани со текот на годините.