Додека чекаме официјална потврда и закажување на есенскиот Apple настан, гласините информираат дека овој настан ќе се одржи исто како минатата година, односно на 10 септември.
На оваа дата Apple ќе ја претстави новата iPhone 16 серија, како и десеттата генерација од Apple Watch и нови AirPods слушалки. Според информациите од Марк Гурман, Apple веќе го има завршено видеото од настанот, кој веќе неколку години не се одржува во живо со публика како порано, па времето за настанот се ближи.
Од новата iPhone 16 серија не се очекува многу, а тоа е и веќе стандардно од повеќето производители. Дизајнот треба да биде ист, а тоа што може да се очекува е малку поголеми екрани кај Pro моделите, како и ново копче за сликање кај овие модели.
Гурман исто така информира дека Apple веќе тестира четири нови Mac компјутери кои работат на новиот М4 чип. Овие компјутери се очекува дека ќе дојдат со основната верзија од чипот, односно засега не е познато дали може да се очекуваат и M4 Pro и M4 Max.
Компјутерите кои може да се очекуваат во октомври се нови MacBook Pro, Mac mini и iMac.
Едниот од четирите модели кои ќе бидат претставени ќе дојде со помалку процесорски и графички јадра, односно ќе биде наменет за некој основен и поевтин модел.
