На почетокот од овој месец Европскиот Парламент го изгласа законот кој, покрај другите работи, бара од производителите да го користат USB-C приклучокот кај нивните уреди. Обврската ќе почне да се применува од 2024 година, а вниманието разбирливо се насочи кон Apple кои се можеби и последните кои не го користат овој приклучок кај нивните iPhone телефони.
За време на годишната Tech Live конференција од The Wall Street Journal, говореа вишиот потпретседател за софтверско инженерство Крег Федериги, како и Грег Џосвиак виш потпретседател за светски маркетинг.
Грег Џосвиак кажа дека од компанијата ќе се придржуваат до одлуката на ЕУ, но не кажа дали тоа ќе значи префрлување на USB-C за сите пазари во светот или само во Европската Унија. Како одговор на тоа прашање тој кажа дека од него се бара да ја предвиди иднината, што значи дека од компанијата уште ја немаат донесено одлуката за ова.
Очекувано од Apple не се задоволни што се приморани да го променат приклучокот кој го користат, а тие се одамна познати по користењето на сопствени решенија, нешто што и самите го кажаа за време на конференцијата.
Иако од компанијата користењето на нивниот приклучок го поврзуваат со иновација, можеби тоа било така при неговото воведување, сепак едно од главните причини поради кои се верува дека Apple имаат отпор кон користењето на USB-C е парите кои ги добиваат од огромниот број на додатоци за iPhone кои го користат Lightning приклучокот.
На конференцијата Крег Федериги говореше на тема рекламирање и приватност, односно одлуката на Apple да ја воведат функцијата која им овозможува на корисниците да изберат дали сакаат да им дозволат на апликациите да ја следат нивната активност на телефонот. Ова беше „контроверзна“ одлука која ги намали приходите на Meta и слични компании за доста голем процент.
