Содржината која што ја гледаме на Instagram, како и на другите друштвени мрежи, е прикажана од страна на алгоритам кој врз основа на нашите интереси и интеракција на мрежата, одлучува што да ни биде прикажано.
Ова е веќе одамна познато, а и сме пишувале на темата повеќе пати. Се што правиме на друштвените мрежи, како притискање на „лајк“ на објави, нивно споделување и отворање, видеата кои ги гледаме, луѓето кои ги следиме и слично, се зема во предвид за да се добие претстава што е тоа што би сакале да го видиме.
Сега Meta ќе овозможи овие предлози од страна на алгоритамот да бидат ресетирани и целиот процес да почне од почеток.
Ресетирањето ќе важи за целата содржина која ја гледаме на Instagram, односно за стандардните објави, за „explore“ делот, како и за Reels.
Можноста за ресетирање наскоро ќе им стане достапна на сите корисници во светот, а до истата едноставно ќе може да се дојде преку прилагодувањата на апликацијата.
По ресетирањето, алгоритамот повторно ќе почне да ги учи навиките и преференциите на корисниците, по што корисникот ќе почне да гледа различна содржина, доколку не продолжи да ја користи мрежата на целосно ист начин.
Од Meta иако оваа новина ја пуштаат за сите корисници, ја промовираат како доста важна за помладите, односно тие под 16 години. Покрај стандардните заштити, на овој начин тинејџерите ќе можат подобро да ја прилагодат содржината што ја гледаат, во случај истата да не е баш погодна за нив.
