Видео содржината на мобилната апликација на YouTube за Android досега беше ограничена на 1440p, нешто што секако не е случајот со веб верзијата од сервисот, а исто така не беше случајот ни на iOS.
Со најновата верзија од YouTube на Android, корисниците сега ќе можат да ја гледаат содржината прикачена во 4K резолуција и HDR во таа форма, односно ќе можат да ја гледаат во најголемата резолуција.
Единственото нешто што останува е да се има уред кој имa 4К екран, а поради некоја причина, исто како на десктоп, YouTube не ја ограничува резолуцијата на максималната на уредот од кој се гледа, па достапни се сите резолуции до 4K.
Тоа значи дека кога гледате видео на YouTube, сепак не е лошо да ја проверите резолуцијата и да не ја избирате 4K доколку вашиот мобилен не ја поддржува и со тоа непотребно да го трошите вашиот интернет лимит.
Како и да е, со оваа новина, корисниците на Android, поточно на поскапите модели, добиваат многу подобро корисничко искуство со можноста да ја искористат способноста на нивниот екран целосно.
