Според истражување од страна на американските власти кои имаат пристап до класифицирани информации од разузнавачките служби, како и истражување од страна на The New York Times, апликацијата ToTok е апликација која се користи за следење на сите активности на своите корисници.
Апликацијата е направена од страна на компанија со седиште во Абу Даби и истата има добиено доста голема популарност во месеците од кога е претставена. ToTok се користи веќе од милиони корисници низ светот, а не само во Обединетите Арапски Емирати, а големата популарност во САД е тоа што има привлечено внимание.
Оваа апликација треба да им овозможи на корисниците безбедни текстуални и видео разговори, но според истражувањата истата се користи за целосно следење на своите корисници, од нивните разговори, до нивната локација, состаноци, слики, врски и слично.
Од Google и Apple веќе се одлучија да ја тргнат апликацијата од Play Store и AppStore, но тие кои ја имаат инсталирано можат слободно да продолжат да ја користат.
Според истражувањата, компанијата која стои зад развојот на ToTok е Breej Holding, но се тврди дека таа е компанија поврзана со DarkMatter, компанија од Абу Даби која се занимава со „сајбер“ разузнавање и хакирање.
Искористувањето на апликациите за разговор, па и другите апликации, за следење на корисниците е нешто што веќе претставува голем проблем во ова модерно време. Впечатокот е дека сепак западот има нешто поголема контрола врз своите институции, па за следење на корисниците се прават многу посложени и потешки мерки, додека на истокот истото се прави најдиректно и без никаква контрола.
Иако нема никаква гаранција за нивната безбедност, сепак препорачливо е да корисниците разговорите ги прават преку веќе познатите со години апликации, кои постепено почнуваат да нудат шифрирање на разговорите, нешто што сепак може и да се провери кај тие со отворен код.