Британската влада, поточно Одделението за дигитално, култура, медиуми и спорт, излезе со предлог за воведување на „првиот во светот“ кодекс за практика за поставување на минимални безбедносни и барања за приватност за продавниците за апликации и програмерите.
Од владата се повикуваат на извештај од страна на Националниот центар за сајбер безбедност кој покажува дека податоците и парите на корисниците се загрозени поради апликациите кои имаат малициозен софтвер, а тука се и апликациите кои се лошо направени, односно имаат недоволно добро развиен код.
Во предлогот стојат продавниците за апликации на мобилните, но и на играчките конзоли, телевизорите и други паметни уреди. Посебно се истакнуваат и компаниите Apple, Google, Huawei, Microsoft и Samsung.
Една од практиките која е дел од предлогот на владата е продавниците за апликации да имаат процес за пријавување на проблем со апликациите со цел тие да можат побрзо да бидат откриени и исправени.
Од владата планираат да примаат предлози од компаниите во ИТ индустријата и со тоа подобро да се подготват сите предлози кои би требало после да почнат да се почитуваат.
Поголемите компании веќе имаат механизми за проверка на апликациите, иако не ретко се критикувани за достапноста на малициозни апликации. Сепак, ваквите ситуации се поретки, па најчесто проблематичните апликации се инсталираат или надвор од продавниците или од помали продавници од трети страни.