Bitwarden е една од најпознатите апликации за чување на лозинките, нешто што веќе одамна го препорачуваме како нешто што мора да се практикува, односно да се користи ваква апликација поради подобра безбедност на интернет.
Со користењето на таканаречените „менаџери“ на лозинки, се што треба е да запаметите една лозинка, таа со која го отклучувате вашиот безбеден „трезор“ со лозинки, а поради тоа сите лозинки кои ги чувате може да бидат доволно сложени и различни за сите сервиси.
Bitwarden е апликација со отворен код која нуди бесплатно користење за обичните корисници, па се доплаќа само доколку ви се потребни некои од додатните функции, но не се доплаќа за користење на повеќе уреди, нешто што обично е карактеристично за конкурентите.
Од компанијата, покрај стандардната можност за генерирање на уникатни и сложени лозинки, сега ја додадоа можноста за генерирање на уникатни кориснички имиња.
Тие со право истакнуваат дека корисниците во главно го користат истото корисничко име кај повеќето сервиси, со што ги остава отворени за потенцијални напади, а посебно при пробивање на некој од сервисите кои ги користат.
Можноста за генерирање на корисничко име треба да стане достапна во периодот што следи, а поради некој причина најдолго ќе се причека за достапност преку мобилните апликации, што значи за почеток ќе може да се користи преку додатоците за интернет прелистувачите и десктоп апликацијата.
Генерирањето на корисничко име ќе може да се прави со избор од три начини, односно генерирање со користење на можноста за додавање на „под-адреса“ кај имејл сервисите кои тоа го поддржуваат, со користење на домејнот, како и со генерирање на збор по случаен избор.
Мала икона ќе биде додадена до полето за корисничко име при креирање на нова сметка, па по тоа ќе може да се познае дали оваа нова функција е достапна за вас.
