Изгледа дека сепак најавата од Тим Кук вчера, која ни порача дека „Има нешто во воздухот“, сепак се однесува на неколку уреди, а не само на MacBook Air. Според Марк Гурман, новата верзија од овој тенок лаптоп може да се очекува утре, а Apple денеска ја претстави седмата генерација од iPad Air.
Шестата генерација од iPad Air беше претставена во мај минатата година, а покрај М2 чипот, таблет компјутерот доби и уште една големина, 13 инчна, покрај 11 инчната верзија.
Денеска претставениот iPad Air исто така е достапен во истите две големини, а чипот на којшто работи е М3. Apple не се одлучи да му го даде на овој поевтин iPad нивниот најнов чип, а поради тоа овој уред продолжува да се продава по пониска, односно поприфатлива цена.
Од Apple карактеристично споредбата не ја прават со ланскиот модел и М2 чипот, поради помала разлика во перформанси, иако истата е доволна, па истакнуваат дека новиот iPad Air е скоро два пати побрз од тој со М1, односно 3,5 пати во споредба со тој со А14 чипот.
Добивањето на М3 чипот за iPad Air исто така значи и добро подобрување на графиката, односно 40% подобрување во споредба со М1, како и за првпат за овој уред поддршка за динамично кеширање, заедно со хардверски забрзани „меш сенки“ и „ray tracing“.
Со оглед на тоа што новиот iPad Air работи на М3 чипот и има 8GB RAM, корисниците ќе имаат пристап до Apple Intelligence, иако Apple не добива баш најдобри реакции и оценки за овие функции досега.
Исто како и iPad Pro минатата година, iPad Air ја добива новата Magic Keyboard која донесува поголем „тракпад“, како и 14 функциски копчиња на горната страна.
Apple покрај овој таблет, ја претстави и единаесеттата генерација од оригиналниот iPad, но слободно може да се каже дека доста помалку корисници би биле заинтересирани за него.
Надградбата донесува дупло повеќе простор за податоци, како и А16 Bionic чипот, но без доволно нови перформанси за Apple Intelligence. Овој таблет е погоден за корисниците кои сакаат да платат најмалку, а сакаат да користат iPad и уредот во главно го користат за разгледување веб страни, друштвени мрежи, видеа и слично.
