Ring е компанија која го произведува најверојатно најпознатото паметно ѕвонче за влезните врати. Amazon ја купи оваа компанија пред неколку години, па сега е дел од нивната понуда.
Видеа кои се снимени со Ring се познати по друштвените мрежи веќе подолг период, а во главно поради интересните и смешни ситуации кои ги имаат начекано. Нив секако ги објавуваат нивните сопственици.
Оваа компанија неколку пати беше позната и по проблемите поврзани со приватноста, како на пример соработката со полицијата и овозможување на видеата без согласност од сопствениците, но тоа е тема за друга статија.
Amazon реши да ја искористи популарноста на овие видеа и од нив да направи телевизиско шоу. Шоуто е наречено Ring Nation и ќе се емитува во САД, а направено од страна на MGM Television, компанија која исто така е во сопственост на Amazon.
Според информациите, на Ring Nation ќе се прикажуваат видеа кои ги имаат испратено сопствениците на Ring ѕвончиња, а кои вклучуваат видеа од соседи како спасуваат соседи, барања за брак, смешни животни и слично. Водител на шоуто ќе биде познатата комедијантка и актерка Ванда Сајкс.
Ring Nation треба да почне да се емитува при крајот на септември.