Една од новините кои беа најавени за Anniversary Update, односно најновата верзија од Windows 10, беше поддршката за десктоп програми кои може да се инсталираат преку Windows Store.
Се работи за конвертирање на програмите преку таканаречените мостови, кои овозможуваат iOS апликации лесно да се преработат за Windows 10, веб страни како апликации, како и win32 програмите да се претворат во Windows 10 апликации.
Project Centennial е наречен „мостот“ кој им овозможува на програмерите да ги претворат своите „обични“ програми, во модерни апликации, достапни за симнување преку Windows Store.
Првите вакви апликации се конечно достапни, а Microsoft ги објави за корисниците оваа недела. Тоа значи дека корисниците ќе можат овие програмите да ги симнат од Windows Store, наместо да ги бараат од нивната страна, па да ги инсталираат.
Едни од првите програмите кои се достапни преку продавницата ги вклучува следните: Evernote, Arduino IDE, doubleTwist, PhotoScape, MAGIX Movie Edit Pro, Virtual Robotics Kit, Relab, SQL Pro, Voya Media, Predicted Desire и korAccount.
Освен Evernote, другите апликации ќе бидат достапни во текот на наредните денови, а Evernote можете да ја симнете преку следниот линк.
Сигурно си го поставувате прашањето, која е целта и предноста да обичните програми бидат конвертирани во „модерни“. Се работи за неколку дополнителни функции кои се добиваат со користењето на UWP, а тие вклучуваат:
- Симнување на апликациите од едно централизирано место, односно Windows Store
- Ажурирање на апликациите преку Windows Store, што овозможува корисниците секогаш на време да ја имаат најновата верзија
- Можност за користење на Live Tiles
- Можност за интеграција со Cortana
- Можност за интеграција со Action Center, односно центарот за известувања
- Можност за прилагодување на апликациите за достапност и на другите видови на уреди, како мобилните
Доколку програмерите го прифатат овој концепт на работа, ќе дојде до промена на начинот на откривање и инсталирање на апликации на Windows. Корисниците ќе можат тоа да го прават од едно место, како што е веќе случајот на Mac OS и Linux, со што ќе се зголеми и безбедноста на интернет.
