Доколку сте програмер кој што развива за десктоп оперативниот систем од Apple, OS X, сигурно веќе имате пробано некоја од достапните бета верзии, пред официјалната верзија да биде достапна за сите корисници. Меѓутоа пристапот за програмерите се плаќа годишно и за обичниот корисник не е нешто што е потребно, а и исплатливо со цената од 99 долари.
Почнувајќи од оваа недела, секој корисник ќе може да се вклучи во тестирањето на бета верзиите од OS X оперативниот систем без потреба од програмерски пристап или било каков паричен надомест. За таа цел Apple ја започна OS X Beta Seed Program, програма која што ви овозможува да ги инсталирате бета верзиите од оперативниот систем. Се што треба е да се приклучите во програмата со вашата Apple ID сметка и достапните бета верзии ќе можете да ги инсталирате преку делот за надградби во продавницата за апликации на Mac уредот.
Оваа програма е корисна за тие што би сакале да се вклучат во процесот на тестирање на новите функции на оперативниот систем пред тие да биде официјално достапни. Исто така од ова корист имаат и Apple, поради поголемиот број на корисници кои што ќе може да ги инсталираат бета верзиите и со тоа подобро да ги откријат потенцијалните „бубачки“, како и одредени предлози од корисниците. Пристап до бета верзиите веќе нуди Microsoft за својот оперативен систем и е масовно прифатен од корисниците.
Доколку сте корисник на OS X и сакате да ги пробате новите функции пред другите корисници, можете да се приклучите во Beta Seed програмата преку следниот линк.
