Еден од најпознатите брендови и со голема база на фанови, OnePlus, минатиот месец најави дека станува дел од исто така познатиот Oppo. Овие две кинески компании веќе беа под еден сопственик, BKK Electronics, заедно со Vivo и Realme, па сепак оваа одлука не претставува толку голема промена за компанијата.
После спојувањето и најавата дека двата брендови ќе продолжат да функционираат посебно, очекувана беше најавата од оваа недела. OnePlus објавија дека веќе нема да продолжат со посебен развој на нивниот оперативен систем OxygenOS, па кодот на истиот ќе биде интегриран во системот на Oppo, ColorOS.
Корисниците не би требало да ја забележат разликата поради тоа што се работи за заднинска промена, а за интернационална употреба, односно надвор од Кина, оперативниот систем ќе го задржи своето име. Во Кина, ColorOS ќе биде името и за уредите од OnePlus.
Новиот систем ќе почне да се употребува кај новите уреди, а ќе го добијат како надградба и дел од постарите модели. Од компанијата најавија и подолга поддршка за своите корисници кои кај најдобрите модели може да очекуваат до три нови верзии од Android за својот уред.
Од OnePlus најавуваат дека сега имаат многу повеќе ресурси и програмери од кога се споија со Oppo и корисниците можат да очекуваат почести и постабилни надградби на своите уреди.
