Microsoft вчера го одржа својот „See the Future of Hybrid Work, Powered by Windows“ настан во кој можеа да се видат одредени новини кои од компанијата ги спремаат за Windows, како и другите сервиси.
Со оглед на тоа дека повеќето новини повеќе би ги интересирале компаниите, односно тие кои практикуваат хибриден начин на работа, како што кажува и самиот наслов на настанот, една работа привлече најмногу внимание за нас обичните корисници.
Тоа е конечната потврда од Microsoft дека File Explorer добива поддршка за „табови“. Ова е нешто што со години се бара од страна на корисниците, а е и причина зошто се толку популарни неколку алтернативи.
Оваа новина функционира точно како што би се очекувало, односно корисниците сега ќе може да отворат повеќе табови во File Explorer, наместо повеќе прозори, да ги поместуваат, да префрлуваат датотеки и папки и слично.
Од Microsoft за жал не објавија кога може да се очекува оваа новина за сите корисници, па претпоставките се дека тоа би се случило во есен кога ќе биде пуштена и првата поголема надградба на Windows 11, 22H2.
File Explorer добива уште неколку новини кои корисниците веќе ги тестираат преку Dev и Beta каналите од Windows Insider, како што се можноста за прикачување на датотеки на главниот екран од апликацијата, нови можности за споделување и слично.
Целиот вчерашен настан можете да го погледнете на следниот линк.
