Од оваа недела достапни се нови верзии од двата оперативни систем развивани од Apple, iOS и OS X Yosemite. Се работи за помали надградби, како што може да се види и од бројките на верзиите, меѓутоа сепак има неколку нови работи кои што вреди да се споменат.
iOS 8.3 доаѓа со подобрувања на перформансите и исправка на повеќе багови и грешки пријавени и откриени во претходната верзија. Главната новина во оперативниот систем се новите emoji икони кои се користат во апликациите за пораки и слични. Тие доаѓаат со нов избор, поточно 300 нови икони, како и можност за промена на бојата на кожата на истите.
Главната надградба на OS X е претставувањето на најавената нова Photos апликација која што ги заменува досегашните iPhoto и Aperture. Новата апликација е направена во стилот на мобилната, доаѓа со поедноставен кориснички интерфејс и најважното, синхронизација на сликите во облакот, а со тоа и со другите уреди.
Photos апликацијата е поделена во четири категории, односно табови за сите слики, албуми, споделени слики, како и можност за печатење на избраните албуми за кои што од Apple ќе овозможат избор на дизајни.
Покрај Photos апликацијата, новата верзија на OS X ги вклучува и новите emoji икони од iOS, сигурносни подобрувања на Safari, како и исправки на одредени проблеми со безжичните мрежи.
Новите верзии од оперативните системи се достапни преку самите уреди, односно функциите за надградба на истите и можете да ги симнете.
