Минатата недела, до некаде и на изненадување на повеќето, Џеф Безос најави дека тој и неговиот брат ќе бидат првите патници на неговата Blue Origin. Лансирањето ќе биде на 20ти јули, а ова ќе биде првпат компанијата да прати луѓе во вселената, односно во овој случај скоро до неа.
New Shepard е ракетата која ќе го однесе патничкиот модул до висина од околу 100 километри, каде патниците ќе можат да ја почувствуваат бестежинската состојба, а и да ја видат Земјата со нејзината заобленост.
Уште од најавата на Џеф Безос дека ќе патува со неговите брат, беше најавено дека во тек е наддавање за третото планирано место. Тоа значи дека третиот патник може да биде било кој, односно тој кој ќе понуди најмногу пари за патувањето.
Наддавањето заврши пред два дена и третото место официјално е продадено за 28 милиони долари. Идентитетот на победникот не е објавен, а од Blue Origin истакнаа дека тоа ќе го направат во неделите што следат.
Парите кои се добиени за третото место ќе бидат искористени за фондацијата на Blue Origin, наречена „Club for the Future“, која има за мисија да ги инспирира идните генерации да изберат кариера во областа на науката, технологијата, инженерството и математика.
Интересно ќе биде да се види кој е третиот човек кој ќе лета заедно со Џеф и Марк Безос, а со оглед на сумата која ќе ја даде за ова „задоволство“, може сепак да се претпостави позадината од каде доаѓа тој.