Додека се води војната во Украина, во светот се води друга војна на пропаганда од западот и истокот. Веќе е очекувано дека и двете страни ќе ги блокираат спротивните медиуми, обвинувајќи ги за ширење на лаги и пропаганда.
Противењето на ваквата практика, со ретки исклучоци каде се повикува на убивање и слично, треба да е едноставна одлука зад која би застанале сите, но за жал секој верува дека неговата страна е во право, па се што се прави против другата страна е оправдано.
Елон Маск е меѓу ретките луѓе кој реши да не ја „игра оваа игра“, па одби да ги блокира руските медиуми преку неговата компанија за сателитски интернет Starlink.
Тој преку Twitter објава истакна дека на Starlink им било кажано од некои влади, но не и од украинската, да ги блокираат руските извори на вести. Тој продолжува со изјавата дека тие нема тоа да го направат, освен „по закана од оружје“, па се извини што е апсолутист за слободата на говор.