TikTok во текот на викендот донесе одлука да го запре објавувањето на нова содржина во Русија, вклучувајќи го и стримингот во живо. Тоа што ќе остане да функционира се пораките помеѓу корисниците.
Причината за ваквата одлука е донесувањето на нов закон во Русија според кој сите кои шират лажни вести за армијата или промовираат санкции кон земјата ќе бидат казнети, а тие казни може да бидат и до 15 години затвор.
Од TikTok истакнуваат дека прекинот во Русија ќе трае до истражувањето на влијанието кое би можело да го има новиот закон на вработените, како и на корисниците.
Во Русија изминатиот период беа блокирани Facebook, Twitter, како и одредени западни медиуми. Истата практика се случува и од другата страна, па западните земји ги блокираа неколкуте државни медиумски куќи од Русија, а посебно се истакна одбивањето на Елон Маск да ги блокира овие медиуми преку неговата компанија за сателитски интернет Starlink.