Microsoft денеска закажа настан кој ќе се одржи на 22ри септември, а според сликата во најавата се гледа дека се работи за настан на кој ќе бидат претставени нови Surface уреди.
Во најавата нема никакви информации за што точно ќе биде претставено, па како и обично оставени сме на неофицијалните информации.
Настанот ќе се одржи само онлајн со почеток во 17:00 часот по македонско време, а ќе може да се следи преку страната на Microsoft. Се надеваме дека од компанијата го имаат решено проблемот кој се јавуваше со „стримот“ за време на претставувањето на Windows 11 или дека овој пат ќе пуштат и YouTube стрим.
Според неофицијалните информации, се очекува дека Microsoft ќе ги претстави Surface Pro 8, Surface Go 3, како и Surface Duo 2 кој е Android телефон.
Хибридните лаптоп компјутери треба да имаат освежен дизајн, повеќе сличен со тој кај Surface Pro X, кој има помали рамки околу екранот.
За Surface Duo 2 се очекува дека ќе има карактеристики како водечки телефон од 2021, за разлика од првиот модел кој имаше просечни и застарени карактеристики, иако чинеше 1.400 долари.
