Очекуваните и веќе подолго време најавувани промени на закон во ЕУ, се официјално донесени и истите ќе почнат да бараат од производителите на помалите уреди да почнат да користат еден стандарден конектор за полнење. Тој конектор секако е USB-C, а повеќето производители веќе и го користат.
Ова можеби и немаше да биде толку голема вест да не беа Apple, кои уште одбиваат да се откажат од нивниот Lightning конектор кој повеќе имаше логика пред преставувањето на USB-C и поновите USB стандарди за пренос на податоци и енергија.
Според промените во законот, до есента во 2024 година, уредите како мобилни телефони, таблет компјутери, електронски читачи на книги, слушалки, дигитални камери, мали играчки конзоли и преносни звучници, ќе мора да го користат USB-C конекторот за нивно полнење.
Од ЕУ оваа одлука ја правдаат преку тврдењето дека на овој начин ќе се намали електронскиот отпад, корисниците ќе имаат полесен избор, а исто така ќе заштедат доста пари на полначи и кабли.
За Apple можевме да прочитаме дека веќе тестираат користење на USB-C кај iPhone, па најверојатно iPhone 14 оваа година ќе биде и последниот кој ќе користи Lightning конектор, па почнувајќи од iPhone 15, кој ќе биде претставен во 2024, полнењето ќе се прави преку USB-C.
Apple веќе се име префрлено на USB-C кај поновите iPad уреди, како и MacBook компјутери. Се верува дека главната причина за продолжување да се користи Lightning кај iPhone се додатоците кои ги има многу за овој телефон, а за кои Apple наплаќа за можноста да работат на нивниот конектор.
Како и да е, корисниците од 2024 година веќе нема да мора да се мислат многу дали нивниот уред може да се полни со некој кабел, а Apple корисниците конечно ќе можат да почнат да ги користат полначите од нивните Android пријатели.