Instagram најави дека нивната функција за пребарување конечно ќе почне да вклучува и објави, односно содржина од мрежата. Тоа значи дека доколку пребарате со внесување на некој збор, како на пример вселена, покрај профилите и „хаштаговите“, ќе ви бидат прикажани и слики.
Досега пребарувањето на Instagram во главно беше насочено кон откривање на други корисници, како и „хаштагови“ со цел откривање на теми за следење. Со оглед на огромниот број на јавни профили со одлични слики, можноста за нивно пребарување, односно прикажување во резултатите е логично и очекувано.
Ова значи дека сега Instagram може да се користи за откривање на интересни и убави слики на одредена тема, па тоа нема да мора да се прави преку прегледување на голем број на различни профили.
Оваа новина уште не е дел од Instagram, па од компанијата само ја најавија како нешто на кое работат. Тоа значи дека може да се очекува во периодот што следи, но не е дадено точно време.
Од Instagram исто така објаснија како функционира нивниот алгоритам при прикажување на резултати од пребарување. Па така, покрај внесениот текст во полето за пребарување, влијание имаат и активноста на корисникот, односно што е тоа што го следите, какви објави прегледувате и слично, а тука е и самата популарност на профилите кои се прикажуваат како резултати.