iWork е пакет на апликации, односно Pages, Numbers и Keynote, кои им се достапни на корисниците на некои од уредите од Apple. Порано достапни за одреден надомест, веќе одреден период корисниците можат да ги користат бесплатно.
iWork for iCloud е верзија од овие апликации достапна преку веб, односно верзии како што се Google Docs и Office Online апликациите. За да можете да ја користите оваа онлајн верзија од iWork, досега беше потребно да сте корисник на Apple, односно да поседувате барем еден уред како Mac, iPhone или iPad, на пример.
Од оваа недела Apple го трга ова ограничување и ги прави достапни апликациите за било кој корисник кој што има или ќе креира Apple ID сметка. Со тоа и апликациите од Apple стануваат мултиплатформски во време кога тоа станува популарно и навистина корисно за компаниите, а се разбира на крај и за корисниците.
Со креирањето на Apple ID, корисниците добиваат 1GB бесплатен простор кој што ќе може да го користат за зачувување на документите кои што ќе ги направат преку iWork апликациите.
За почеток овие апликации се достапни за сите корисници преку beta верзијата од iCloud страната, па се очекува во иднина да бидат официјално достапни на главната страна.
Иако iWork апликациите достапни преку веб не ги нудат огромниот број на функции и можности како што е тоа случајот со Google Docs или Office Online од Microsoft, сепак нивната достапност за сите сигурно ќе придонесе за зголемување на конкуренцијата помеѓу компаниите. Тоа на крај секогаш резултира со подобри сервиси за корисниците кои што покрај тоа, ќе имаат и поголем избор од различни компании.
Извор: The Verge, TechCrunch
