Познатото „плико“ на Gmail кое е лого на овој сервис од самиот почеток, конечно добива редизајн. Викаме конечно затоа што сепак брендовите е добро кога ги освежуваат или менуваат своите логоа, а истото можеме да го кажеме и за тоа на Gmail кое веќе почна да делува застарено, барем според нас.
Новото лого секако ја задржува буквата М како негова основа, а промената може да се каже дека е доволно голема. Наместо познатото плико, сега логото ја содржи само буквата М, која е составена од бренд боите на Google.
Ова ново лого е многу повеќе унифицирано со другите сервиси од Google, како на пример Maps, Photos и другите.
Gmail не е единствениот сервис кој добива ново лого, а освежувањето го добиваат и останатите апликации од G Suite, односно Docs, Sheets, Calendar, Drive, Meet и Slides.
Новите логоа на овие сервиси не се единствената новина, па Google му даде целосно ново име на овој сервис за деловните корисници. G Suite отсега ќе се вика Google Workspace, а слободно може да кажеме дека ова ново име е многу подобро и новите корисници многу полесно ќе можат да разберат за што точно се работи.