ARM го претстави дизајнот за наредната генерација од процесори, а ова се одлични вести за корисниците на Android и PC кои идната година можат да очекуваат добри зголемувања на перформансите на нивните уреди.
Дизајните од ARM ги користат компании како Qualcomm, Samsung и MediaTek, кои се најпознатите во светот за производство на мобилни чипови.
Главниот нов процесор кој го најави ARM е Cortex-X3, третата генерација од силните Cortex-X процесори, а е втората која работи на новата armV9 архитектура која беше претставена минатата година.
Рано е за поголеми детали, но од ARM најавуваат дека Cortex-X3 ќе донесе 25% подобрување на перформансите кај смартфоните, а ова подобрување ќе достигне дури 34% кај компјутерите.
Со оглед на тоа дека мобилните чипови редовно се развиваат и надградуваат, тоа што навистина го очекуваме е конечно претставување на добра алтернатива на MacBook кај Windows конкурентите. Иако Intel со новите генерации овозможува доста поштедливи чипови, сепак тешко кој успева да им конкурира на M чиповите од Apple.
ARM ги претстави и Cortex-A715, како и Cortex-A510, очекувано со оглед на тоа што чиповите обично се прават со неколку видови на процесори со што се овозможуваат поголеми перформанси, но и заштеда на енергија.
За Cortex-A715 се истакнува дека може да се спореди со Cortex-X1, најсилниот процесор за мобилните пред две години.
Од компанијата го претставија и дизајнот за наредната генерација од графичките процесори кои сега го носат брендот Immortalis. Тоа што ќе донесат овие процесори е „ray tracing“ кај мобилните, односно ARM донесува конкуренција на AMD кои веќе преку Samsung ја овозможуваат оваа функција.
Засега нема најави дека овој процесор ќе биде достапен и кај Windows компјутерите, но сепак ќе оставиме до идната година да видиме што се ќе биде претставено на пазарот на основа на овие нови дизајни.