Познатиот Flash официјално престанува да добива поддршка заклучно со утрешниот ден, односно 31-ви декември 2020. Додатокот ја доби својата последна надградба пред неколку недели, а од 12-ти јануари Adobe ќе почне да ја блокира содржината преку Flash Player.
Поради безбедносниот ризик за корисниците кои уште ја користат оваа стара технологија и по завршетокот на поддршката, Adobe почна со нивно известување преку кое тие ќе можат целосно да го избришат додатокот од својот компјутер.
Сепак, бројката на корисници кои уште го користат Flash е мала, а тоа нема да можат да продолжат да го прават и причина за тоа не е само блокирањето на содржината од страна на Adobe.
Microsoft ќе пушти надградба за Windows 10 идната година која целосно ќе го избрише додатокот, а истото ќе го направат и интернет прелистувачите. Mozilla ќе го направи тоа со наредната верзија од прелистувачот, односно од 26-ти јануари, а истото се очекува и од наредните верзии од Chrome и Edge.
