Извори во Microsoft на Windows Central, најавуваат промена во стилот на третата верзија од Surface Duo уредот со двоен екран. Нема информации дека двете верзии од овој уред се покажаа нешто посебно популарни, па од компанијата иако веќе го имаат завршено дизајнот на Surface Duo 3, плановите за негово пуштање биле откажани.
Новите планови на Microsoft вклучуваат уред со екран кој се превиткува, односно нешто како Galaxy Z Fold серијата, наводно. Тоа значи дека уредот би имал еден екран кој се преклопува на внатрешната страна и уште еден екран за користење во режим на смартфон од надворешната страна.
Нема повеќе информации за кога би можеле да го очекуваме овој уред од Microsoft кој може да користи и друг бренд, а не Surface Duo. Дополнително се очекува дека Microsoft ќе работи на софтверот кој треба да овозможи нешто поразлично искуство од останатите Android уреди, а исто така поголема поврзаност со Windows, нешто како што Apple им овозможува на нивните корисници.
Според изворите на Windows Central, можно е Microsoft да претстави и класичен смартфон под брендот на Surface, исто така на Android, па можеме да очекуваме повторно враќање на компанијата на пазарот на смартфони.
Останува само да видиме што од ова е точно, а и што навистина ќе се реализира, односно нема да биде откажано.