5G како технологија продолжува да има проблеми во процесот на своето пуштање, а овој пат се работи за проблем кој навистина може да направи разлика, за разлика од голем број на неиздржани теории.
Конкретно се работи за пуштањето на C-Band фреквенцијата, односно за фреквенцијата од средниот дел од спектарот, кој треба повеќето оператори да го користат и кој нуди комбинација на поголема достапност и добри перформанси.
Според американската FAA и уште неколку организации, поставување на базни станици со 5G околу аеродромите, може да доведе до пречки во постојните системи на аеродромите кои им помагаат на авионите да слетаат. Еден од тие системи е за одредување на висината на авионот, нешто од кое пилотите зависат многу, а посебно кога се слетува во услови кога тие не можат воопшто или добро да ја видат пистата визуелно.
На FAA им се приклучија директорите на Boing и Airbus за САД, кои бараат одложување на пуштањето на 5G мрежата од операторите во САД, нешто што веќе беше одложено и сега е закажано за 5ти јануари идната година.
Според една од организациите, Airlines for America (A4A), доколку 5G мрежата била пуштена во 2019 година, досега ќе имало откажани или задоцнети околу 345.000 комерцијални летови и 5.400 транспортни летови.
Веќе можевме да прочитаме за можноста 5G да прави пречки на аеродромите, па приклучувањето на директорите на двете најголеми компании кои произведуваат авиони, сигурно дава тежина и значење на ситуацијата.